Эх орныхоо хөгжил дэвшилд үнэтэй хувь нэмэр оруулж, оюунлаг бүтээлч сэтгэлгээтэй, эерэг зөв хандлагатай ирээдүй хойч үеийг бэлтгэхийн төлөө эрдэм мэдлэг, авьяас чадвар, хүч хөдөлмөр, сэтгэлээ зориулан ажиллаж буй нийт БАГШ, СУРГАН ХҮМҮҮЖҮҮЛЭГЧИДДЭЭ, эрдэм номонд хичээнгүйлэн суралцаж буй эх орныхоо ирээдүй болсон ХҮҮХДҮҮД та бүхэнтэйгээ цахим хуудсаар дамжуулан мэндчилж буйдаа туйлаас баяртай байна.   

Дүүргийн Засаг даргын 2020-2024 оны үйл ажиллагааны хөтөлбөрийн хүрээнд хүний хөгжлийн бодлого, эдийн засаг, нийгмийг хөгжүүлэх үндсэн чиглэлийн зорилтуудыг хэрэгжүүлэхээр төлөвлөж, батлуулсан билээ. Тухайлбал, хүний хөгжлийн бодлогын үйл ажиллагааны хөтөлбөрийн хүрээнд хүүхэд бүрийн сурлагын амжилтыг ахиулах, багшийн нийгмийн асуудлыг шийдвэрлэх чиглэлээр “ЭЛСЭЛТИЙН ЕРӨНХИЙ ШАЛГАЛТ-2021” болзолт уралдааныг зарлалаа. Дүүргийн ИТХ, ЗДТГ-аас хүүхдийн эрүүл, аюулгүй орчинд амьдрах, сурч боловсрох, хөгжих, хамгаалуулах, нийгмийн амьдралд оролцох эрхийг хангах, дүүргийн хэмжээнд хүүхдэд чиглэсэн оновчтой бодлого, үйл ажиллагааг салбар бүрийн оролцоотойгоор төлөвлөж, хүүхдэд ээлтэй орчныг бүрдүүлэх зорилгоор “БАЯНГОЛ-ХҮҮХЭД ХЭРЭГЛЭГЧ” дэд хөтөлбөрийг хэрэгжүүллээ. Түүнчлэн 2021 онд эцэг, эх, багш, сурагчдын хамтын ажиллагааг сайжруулан, багшийн мэргэжлийн тасралтгүй хөгжлийг дэмжих замаар боловсролын үйлчилгээний чанар хүртээмжийг нэмэх зорилгоор “БАЯНГОЛ-ЧАДВАРЛАГ БАГШ” хөтөлбөр, дүүргийн боловсролын салбарт мэдээллийн технологи дээр тулгуурласан нэгдсэн платформыг хөгжүүлж, сургалтыг цахим хэлбэрээр зохион байгуулах зорилгоор “БАЯНГОЛ-ЦАХИМ СУРГУУЛЬ” дэд хөтөлбөрийг хэрэгжүүлэхээр  ажиллаж байна. Мөн сургууль, цэцэрлэгийн сургалтын орчныг сайжруулж, тусгай хэрэгцээт хүүхдүүдийг ердийн сургууль, цэцэрлэгт тэгш хамруулан сургах, хөгжих орчинг бий болгоход анхаарч ажиллах юм.

2021 онд дүүргийн боловсролын салбарт хийгдэж байгаа хөрөнгө оруулалтын талаар товч дурдвал:

• Ерөнхий боловсролын 5 сургууль, 6 цэцэрлэг, 1 бага сургууль цэцэрлэгийн цогцолборын ажилд Улсын төсвийн хөрөнгө оруулалтаар 35.2 тэрбум, Азийн хөгжлийн банкны хөнгөлөлттэй зээл тусламжаар 3.4 тэрбум төгрөгийн, нийт 38.6 тэрбум төгрөгийн төсөвт өртөг бүхий хөрөнгө оруулалт, төсөл арга хэмжээг хэрэгжүүлж, сургууль, цэцэрлэгийн хүчин чадлыг 4470 суудлын тоогоор нэмэгдүүлж байгаагаас 2021-2022 оны хичээлийн жилд барилга, өргөтгөлийн ажлын гүйцэтгэл 95 хувьтай хийгдэж байгаа 4 сургууль, 3 цэцэрлэгийг ашиглалтад хүлээж авахаар бэлтгэл ажил хангагдаад байна.
• 14 цэцэрлэгийн гадна хашаа, тоглоомын талбай, явган замын засварын ажилд 1,578.5 сая төгрөг, 113 дугаар сургуулийн фасад, 164 дүгээр цэцэрлэг, 54, 78 дугаар сургуулийн дээврийн их засварт 421,4 сая төгрөгийн, нийт 2 тэрбум төгрөгийн их засварын ажлууд, мөн сургууль, цэцэрлэгүүдэд 2 тэр бум төгрөгийн тоног төхөөрөмж он дамжин хийгдэхээр батлагдлаа.

Дэлхийн өндөр хөгжилтэй улс орнуудын боловсролын салбарт гаргасан амжилтын жишигт хүрэхийн төлөө манлайлан ажиллаж, хүнлэг энэрэнгүй үзлийг өөртөө шингээсэн ариун ёс, суртахуунтай залуу хойч үеийг сурган хүмүүжүүлэх эрхэм зорилгоо биелүүлэн, түүхэн амжилтуудаа бататган, шинэ цагийн боловсролын салбарыг түүчээлэн ажиллана гэдэгт итгэл төгс байна.

Эрдэм оюуны хур арвин байж, номын цагаан буян үргэлж дэлгэрч байх болтугай

НИТХ-ын төлөөлөгч, Баянгол дүүргийн Засаг дарга Ө.Сумъяабаатар