Баянгол дүүргийн Засаг даргын 2020-2024 оны үйл ажиллагааны хөтөлбөрт “Хүний хөгжлийн бодлого” чиглэлийн хүрээнд “Баянгол-Цахим сургууль” хөтөлбөрийг хэрэгжүүлэхээр тусгасан билээ. Улмаар Баянгол дүүргийн Засаг дарга Ө.Сумъяабаатарын 2021 оны  захирамжаар “Хөтөлбөр боловсруулах чиг үүрэг бүхий ажлын хэсэг“-ийг байгуулсан бөгөөд Нийгмийн хөгжлийн хэлтсээс боловсруулсан хөтөлбөрийн төслийг Засаг даргын зөвлөлийн хурлаар батлаад буй юм.  

Иймд “Баянгол-Цахим сургууль”-хөтөлбөрийн талаар Баянгол дүүргийн Боловсролын хэлтсийн дарга З.Энхгэрэлээс тодрууллаа. Тэрбээр “Баянгол-Цахим сургууль” хөтөлбөрийн зорилго нь боловсролын салбарт мэдээллийн технологи дээр тулгуурласан нэгдсэн платформыг хөгжүүлж, сургалтыг цахим хэлбэрээр зохион байгуулах, сургууль эцэг эх, сурагч, боловсролын байгууллагын харилцааг цахимжуулах, тасралтгүй суралцах боломжийг бүрдүүлэхэд оршиж байгаа юм. Мөн хөтөлбөрийн зорилтын хүрээнд 2021-2024 онд гурван зорилт есөн үйл ажиллагааны чиглэлээр хэрэгжүүлнэ. Үүнд,

Нэгдүгээрт: Цахим сургалтын чиглэлээр багш, сурагчийн сурах, хөгжих үйлийг дэмжихэд бүх талын  оролцоо, түншлэлийг хангаж ажиллах.

Энэ зорилтын хүрээнд, Хамтын ажиллагааг өргөжүүлэх замаар Цахим болон теле хичээл хамрагдалтыг нэмэгдүүлэх, “Дижитал анги” үүсгэхээс гадна цахим гэмт хэргээс Урьдчилан сэргийлэх нөлөөллийн ажлыг зохион байгуулна.

Хоёрдугаарт:  Цахим сургалт зохион байгуулах орчин бүрдүүлэх.

Энэ зорилтын хүрээнд, Боловсролын хэлтсийн цахим хуудсыг хөгжүүлэх, сургуулийн интернет техникийн орчин нөхцөлийг сайжруулах зэрэг ажлыг зохион байгуулна.

Гуравдугаарт: Баянгол дүүргийн нэрийн Цахим сургалтын платформыг хөгжүүлэх гэсэн гурван том зорилтыг дэвшүүлээд байна” гэсэн юм.

 Ташрамд мэдээлэхэд “Баянгол-Цахим сургууль” хөтөлбөрийг

• Монгол Улсын урт хугацааны хөгжлийн бодлого “Алсын хараа-2050”
• Төрөөс боловсролын талаар баримтлах бодлого (2014-2024)
• Цахим засаглал үндэсний хөтөлбөр (2019-2022)
• Боловсролын салбарын дунд хугацааны хөгжлийн төлөвлөгөө (2021-2030)
• Монгол Улсын Засгийн газрын 2020-2024 оны үйл ажиллагааны хөтөлбөр
• Нийслэлийг 2021-2025 онд хөгжүүлэх таван жилийн үндсэн чиглэл
• Баянгол дүүргийн Засаг даргын 2020-2024 оны үйл ажиллагааны хөтөлбөрт үндэслэн боловсруулсан юм.