Баянгол дүүргийн Онцгой комисс цаг үеийн нөхцөл байдалтай холбогдуулан 2021 оны зургадугаар сарын 23-ны өдөр цахимаар хуралдлаа. Хуралд дүүргийн Онцгой комиссын дарга Ө.Сумъяабаатар, дүүргийн удирдах албан тушаалтнууд, хороодын Засаг дарга нар болон Өрхийн эрүүл мэндийн төвийн удирдлагууд оролцлоо. 

Шуурхай хурлаар хоёр асуудлыг голлон хэлэлцсэн.  Тодруулбал, сүүлийн үед “ковид-19” халдварын тархалт эрс нэмэгдэж байгаатай холбогдуулан Эрүүл мэндийн болон Сангийн сайдын хамтарсан тушаалын дагуу ЭМД-ын сангийн санхүүжилтээр гэрээр эмчлүүлж буй иргэнд олгох 70 мянган төгрөгийн эмийн багцын санхүүжилтийг Өрхийн эрүүл мэндийн төвүүд бүрэн авч чадаж байгаа эсэх мөн дээрх багцыг гэрийн тусгаарлалтад байгаа иргэдэд хэрхэн хүргэж байгаа талаар ярилцаж, санал солилцсон юм.

Хурлын үеэр дүүргийн Шуурхай штабын дарга Д.Мөнхбаатар “Дүүргийн Онцгой комисс цаг үеийн нөхцөл байдалтай холбоотой шаардлагатай арга хэмжээг цаг тухай бүрд нь шуурхай авч ажиллаж байгаа. Энэ удаагийн хурлаар та бүхэнд тулгамдаж буй бэрхшээлтэй асуудлыг сонсох, бэрхшээлээс хэрхэн хамтдаа гарах талаар санал солилцох учраас та бүхэн тулгарч буй асуудлаа чөлөөтэй яриарай” гэсэн юм. Үүний дараа зарим өрхийн эрүүл мэндийн төвийн удирдлагууд тодорхой шалтгаанаас болж Эрүүл мэндийн даатгалын сангийн санхүүжилтээр олгож буй багцыг авч чадахгүй нөхцөл байдал үүссэн. Мөн нөхцөл байдал хүндэрсэнтэй холбоотойгоор хүн хүчний нөөц дутагдалтай байна” гэдгийг онцолж улмаар тулгамдаж буй асуудлаа ярилцсан.

Хурлын төгсгөлд дүүргийн Онцгой комиссын дарга Ө.Сумъяабаатар зарим үүрэг даалгаврыг өгсөн. Тухайлбал, Эрүүл мэндийн байгууллагын өгсөн мэдээллээр дархлаажуулалтад хамрагдаагүй иргэд “ковид-19” халдвараар илүү өвчилж байна. Иймд хорооны Засаг дарга болон хэсгийн ахлагч нар Өрхийн эрүүл мэндийн төвийнхөнтэйгөө хамтарч дархлаажуулалтын нэг болон хоёрдугаар тунд хамрагдсан иргэдийн мэдээллийг дахин нягталж гаргах. Хэсгийн ахлагч нар хариуцсан хэсгээсээ хэчнээн иргэн дархлаажуулалтад хамрагдаагүй байна вэ гэдэг мэдээллийн дагуу иргэдтэйгээ холбогдож бүх мэдээллээр хангах. Хоёрдугаарт гэрийн хяналтад байгаа бүх иргэддээ ЭМДС-гийн санхүүжилтээр олгож буй эмийн багцыг хүргэх тал дээр анхаарч ажиллах шаардлагатай байна гээд ЭМД-ын санхүүжилтээр олгож буй 70 мянган  төгрөгийн багц нь төрөөс иргэдийнхээ эрүүл мэндэд анхаарч буй том дэмжлэг. Иймээс Өрхийн эрүүл мэндийн төвийнхөн энэ боломжийг бүрэн ашиглаж, иргэддээ хүргэж ажиллаарай гэдгийг онцолсон юм.