Баянгол Дүүргийн Засаг даргын 2020-2024 оны үйл ажиллагааны хөтөлбөрт Боловсролын салбарт “Баянгол-Чадварлаг багш”, “Баянгол-Цахим сургууль” зэрэг хөтөлбөрийг боловсруулан орон нутгийн хэмжээнд хэрэгжүүлэхээр тусгасан.

Энэхүү хөтөлбөрийн хүрээнд Баянгол дүүргийн Засаг даргын Тамгын газраас 2021 онд боловсролын байгууллагын сургалтын орчныг сайжруулах төсөл арга хэмжээг хэрэгжүүлэн ажиллаж буй бөгөөд сургалтын чанарыг сайжруулах зорилгоор “Элсэлтийн ерөнхий шалгалт-2021” болзолт уралдааныг 2021 оны 04 сараас зохион байгуулж эхэлсэн юм. Тодруулбал, дүүргийн Боловсролын хэлтсээс нийслэлийн хэмжээнд коронавируст цар тахлын улмаас хичээл сургалтын танхимын үйл ажиллагаа хязгаарлагдсантай холбогдуулан Олон улсын хөтөлбөрт сургалттай ерөнхий боловсролын “Шинэ эрин” болон бусад ерөнхий боловсролын сургуулиудтай хамтран “Цахим Баянгол шилжилт” төслийг амжилттай зохион байгуулж буй юм. Энэхүү төсөл хэрэгжсэнээр 2021 оны хичээлийн жилд 12 дугаар ангийг төгсөх 2400 сурагчид зориулсан “Дижитал анги”-ийг цахим орчинд үүсгэн, 97 багш, ажилтны бүрэлдэхүүнтэй баг байгуулан Элсэлтийн ерөнхий шалгалтад бэлтгэх сургалтыг цахим хэлбэрээр зохион байгуулж буйгаараа онцлог юм.   

Дүүргийн элсэлтийн шалгалтын дундаж оноо 2018 онд 526,1, 2019 онд 524,9, 2020 онд 515,6 хэмжээст үзүүлэлтэй байсан ба 2021 онд сурагчдын амжилтыг ахиулахаар дүүргийн Засаг даргын Тамгын газрын Нийгмийн хөгжлийн хэлтэс, дүүргийн Боловсролын хэлтэс хамтран Баянгол дүүргээс УИХ-д сонгогдон ажиллаж буй Х.Ганхуяг, ,Ж.Ганбаатар нарын гишүүдийн дэмжлэгтэйгээр элсэлтийн ерөнхий шалгалтад бэлтгэн ажиллаж байна.

Мөн “Элсэлтийн ерөнхий шалгалт-2021” болзолт уралдааны удирдамжийг сургуулиудад хүргүүлсэн бөгөөд Элсэлтийн ерөнхий шалгалтын судлагдахуун тус бүрд  800 оноо авсан сурагч, түүнийг бэлтгэсэн багшийг тус бүр 1,000,000 төгрөгөөр урамшуулах юм.